22о група наведала Навагрудскую раённую бібліятэку, якая ладзіла літаратурны вечар “Іван Чыгрынаў. Пісьменнік і час”, прысвечаны 90-годдзю з дня нараджэння Народнага пісьменніка Беларусі.
Бібліятэкары прадставілі аповед-прэзентацыю “Іван Чыгрынаў : нарыс жыцця і творчасці”. Творчасць Івана Гаўрылавіча Чыгрынава – яркая старонка ў сучаснай беларускай прозе. Апавяданні і раманы пісьменніка вылучаюцца рэалістычнасцю, глыбокім пранікненнем ва ўнутраны свет чалавека, увагай да жыцця простых людзей, разуменнем іх штодзённых клопатаў і турбот, высокім мастацкім майстэрствам. Значнае месца ў творчай спадчыне пісьменніка займаюць творы, прысвечаныя падзеям Вялікай Айчыннай вайны. І гэта невыпадкова: сам аўтар належыць да пакалення “дзяцей вайны”.
Прагучалі вершы аўтарства Івана Гаўрылавіча і паэтычныя творы-прысвячэнні юбіляру ад беларускіх літаратараў. Быў прадстаўлены шэраг цікавых фактаў з біяграфіі пісьменніка.
